Fyrirtækið

Mjólkursamsalan er rekstrarfélag mjólkuriðnaðarins á Íslandi og er í eigu um 600 kúabænda um land allt. Fyrirtækið er í eigu Auðhumlu (80%) og Kaupfélags Skagfirðinga (20%).Auðhumla er samvinnufélag u.þ.b. 600 kúabænda og fjölskyldna þeirra víðs vegar um landið. 

Mjólkursamsalan í núverandi mynd varð til við hagræðingu í mjólkuriðnaðinum sem hófst skipulega um miðjan tíunda áratuginn þegar stjórnvöld ákváðu að lækka þyrfti kostnað við vinnslu á mjólk. Sameinaðist rúmur tugur félaga í mjólkuriðnaði í færri einingar næsta áratuginn. Sem dæmi sameinaðist Mjólkursamsalan í Reykjavík, Mjólkurbúi Flóamanna árið 2005 undir nafninu MS eftir samstarf árin á undan. Mjólkursamlag Ísfirðinga var selt til MS árið 2006. Árið 2000 runnu Mjólkursamlög KEA og Húsavíkur saman við Grana, sem var einkahlutafélag í eigu bænda, undir nafni Norðurmjólkur. Þessar sameinuðu mjólkurvinnslur runnu síðar saman og mynduðu Mjólkursamsöluna ásamt Osta og smjörsölunni.

Mjólkursamsalan í núverandi mynd hefur starfað frá 2007. Elst fyrirtækið í þessu sameinaða félagi, MS, er Mjólkursamlag KEA, sem var stofnað á sérstökum fulltrúafundi Kaupfélagsins 4. Sep 1927, sem telst vera stofndagur MS.

Fyrirtækið er leiðandi fyrirtæki í matvælaiðnaði á Íslandi. Hlutverk hennar er að taka við mjólk frá eigendum sínum og umbreyta í hollar og góðar mjólkurafurðir í takt við þarfir íslenskra neytenda. Starfshættir Mjólkursamsölunnar einkennast af fagmennsku á öllum sviðum. Nýsköpun í vöruþróun, öflugt sölu- og markaðsstarf, metnaður og þekking þeirra sem koma að framleiðslunni hefur skilað neytendum eftirsóttum gæðavörum. Sérþekking á sviði lagerhalds og dreifingar tryggir landsmönnum reglulegan og öruggan aðgang að ferskum og fjölbreyttum mjólkurvörum hvar sem er á landinu.

Íslenskir neytendur hafa meira úrval hollra og góðra mjólkurvara en þekkist víða í löndunum í kringum okkur. Það grundvallast á því að um sex hundruð fjölskyldur um land allt reka kúabú í góðri sátt við náttúru og samfélag og vinna úrval afurða úr íslenskri hollustumjólk í fyrirtæki sem þær eiga og stjórna saman. Íslenskir bændur hafa alltaf borið gæfu til að standa sjálfir að mjólkurvöruvinnslu og sölu í gegnum samvinnufélög sín. Mjólkursamsalan er sprottin úr þeim jarðvegi. Hún býr að ómetanlegri áratugareynslu sem byggðist upp í mjólkurbúum um land allt og framleiðir yfir þrjú hundruð vörutegundir og pakkningar fyrir heimili, vinnustaði og veitingaþjónustu.

Það hefur jafnan verið styrkur Mjólkursamsölunnar að hún hefur verið í takt við tíðarandann og verið fljót að skynja þarfir markaðarins fyrir nýjungar. Þannig hafa Mjólkursamsalan ehf. og forverar hennar náð að skapa mjólkurvörum markaðsstöðu sem þekkist vart í öðrum löndum Evrópu.

Það er ekki tilviljun að meðalmjólkurvöruneysla á Íslandi er 60% meiri en að meðaltali í Evrópusambandslöndunum. Það er árangur áratuga vöruþróunarstarfs sem haldist hefur í hendur við mikinn metnað í framleiðslu og öflugt sölu- og markaðsstarf. 

Höfuðstöðvar félagsins eru á Bitruhálsi 1 í Reykjavík. Fyrirtækið rekur fimm framleiðslustöðvar; í Reykjavík, Búðardal, á Akureyri, Egilsstöðum og Selfossi. Nánari upplýsingr um starfsstöðvar MS

Hlutverk Mjólkursamsölunnar er að sjá um alla móttöku, framleiðslu, pökkun, markaðssetningu, sölu og dreifingu mjólkurafurða.

Kennitala: 540405-0340
VSK númer: 92557

Aðstoð

Hvernig getum við aðstoðað?