Skólamjólkurdagurinn markar upphaf árlegrar teiknisamkeppni

Alþjóðlegi Skólamjólkurdagurinn er haldinn hátíðlegur víða um heim þann 27. september en líkt og áður er það stofnun Sameinuðu þjóðanna, FAO (Food and Agriculture Organization) sem hvetur til hátíðarhalda á þessum degi. Hér á landi markar dagurinn upphaf hinnar árlegu teiknisamkeppni 4. bekkinga og er óhætt að segja að hennar sé beðið með mikilli eftirvæntingu ár hvert. Samkeppnin hefur notið mikilla vinsælda meðal nemenda og kennara um árabil og hafa mennta- og barnamálaráðherrar tekið þátt í vali á verðlaunamyndum til margra ára og talað um mikilvægi keppna á borð við þessa fyrir skólasamfélagið.

Líkt og áður er myndefnið frjálst en má þó gjarnan tengjast íslensku sveitinni, hollustu og heilbrigði en umfram allt viljum við að börnin gefi ímyndunaraflinu og sköpunargáfunni lausan tauminn svo þau fái tækifæri til að sýna það sem í þeim býr. Að jafnaði berast um 1.300 myndir í keppnina frá nemendum alls staðar af landinu og í mars 2024 verða veitt verðlaun fyrir 10 bestu myndirnar að mati dómnefndar. Hver mynd er verðlaunuð með 40.000 kr. peningagjöf frá MS sem rennur óskipt í bekkjarsjóð viðkomandi og getur bekkurinn nýtt þá upphæð í að gera sér glaðan dag saman og efla liðsheild í samráði við umsjónakennara, bekkjarfulltrúa og/eða skólastjórnendur.

Myndum skal skilað á A3 blaði fyrir 12. janúar 2024.
Mjólkursamsalan – Teiknisamkeppni, Bitruhálsi 1, 110 Reykjavík.