Úrslit í teiknimyndasamkeppni 2009

17.04.2009



Níundi Alþjóðlegi skólamjólkurdagurinn
Úrslit í teiknisamkeppni barna í 4. bekk grunnskólanna
 

Menntamálaráðherra, Katrín Jakobsdóttir, tilkynnti fyrir skömmu úrslit í teiknisamkeppni Alþjóðalega skólamjólkurdagsins, sem haldinn er hátíðlegur síðasta miðvikudag í september ár hvert. Eins og undanfarin ár barst mikill fjöldi teikninga í samkeppnina, sem Markaðsnefnd mjólkuriðnaðarins stendur að hér á landi. Að sögn Guðnýjar Steinsdóttur, markaðsstjóra MS, bárust tæplega 900 teikningar frá 54 skólum alls staðar að af landinu. Tíu nemendum eru veittar viðurkenningar fyrir teikningar sínar að loknu vali á úrtaki mynda sem lagt er fyrir menntamálaráðherra, sem jafnframt er formaður dómnefndar.
 

Markmið keppninnar er að vekja athygli á mikilvægu hlutverki mjólkur í daglegu mataræði barna. Neysla mjólkur hefur aukist í grunnskólum á undanförnum árum, sem m.a. má rekja til mjólkurkælivéla sem víða hafa verið settar upp í skólunum. Katrín Jakobsdóttir, menntamálaráðherra tilkynnti í menntamálaráðuneytinu þriðjudaginn 7. apríl hvaða tíu teiknarar hlytu verðlaun í samkeppninni að þessu sinni.
 

Alþjóðlegi skólamjólkurdagurinn er haldinn að undirlagi Matvælastofnunar Sameinuðu þjóðanna, FAO. Að því tilefni, sem fyrr segir, fer árlega fram hér á landi teiknisamkeppni meðal nemanda í fjórða bekk í grunnskólum landsins. Eru verðlaunateikningarnar notaðar á veggspjöld og annað kynningarefni vegna Skólamjólkurdagsins sem fram fer næst í september.
 

Vinningshafarnir 2009
Harpa Mjöll Þórsdóttir í Húsaskóla, Ingibjörg Elísa Jónatansdóttir í Öldutúnsskóla í Hafnarfirði, Lára Sif Davíðsdóttir í Sjálandsskóla Hafnarfirði, Embla Líf Trepte Elsudóttir í Grunnskóla Bláskógabyggðar í Reykholti, Elmar Blær Arnarson í Hrafnagilsskóla í Eyjafjarðarsveit, Kristín María Vilhjálmsdóttir í Fellaskóla í Reykjavík, Þórhallur Tryggvason í Ísaksskóla í Reykjavík, Sveinbjörg D. Steinþórsdóttir í Fellaskóla í Reykjavík, Hafþór Ingólfsson í Nesskóla á Neskaupstað, og Valgerður Pétursdóttir í Síðuskóla á Akureyri.
 
Hver verðlaunahafanna fær 25 þúsund krónur, sem renna óskiptar í bekkjarsjóð viðkomandi. Vinningsteikningarnar verða senn aðgengilegar á vefslóðinni www.ms.is.
 
 
Dómnefndin að störfum:
F.v. Guðný Steinsdóttir, markaðsstjóri MS, Björn S. Gunnarsson frá Markaðsnefnd mjólkuriðnaðarins og Katrín Jakobsdóttir menntamálaráðherra íhugul við myndavalið.

Fleiri fréttir