Stór áfangi í sókn Ísey skyrs á Japansmarkaði

12.04.2019

Á mánudaginn sl, þann 8.apríl, kom til landsins Yoshihide Hata forstjóri Nippon Ham, sem er eitt stærsta fyrirtæki Japans á sviði ferskra og frosinna matvæla og jafnframt fjórði stæsti kjötframleiðandi í heims. Þar starfa 30.000 manns og fyrirtækið veltir um 1.400 milljörðum árlega.

Heimsókn hans tengist undirbúningi framleiðslu og sölu á Ísey skyri í Japan, en dótturfyrirtæki Nippon Ham, mjólkurvörufyrirtækið Nippon Luna gerði framleiðslu og vörumerkjasamning um Ísey skyr við MS á síðasta ári. Nippon Ham tók fyrr á árinu ákvörðun um að gera Ísey skyr að sinni aðal heilsuvöru sem er mjög þýðingarmikið fyrir alla markaðssókn sem viðkemur Ísey skyri þar í landi. Áætlanir gera ráð fyrir að mikill kraftur verði settur í markaðssetninguna og að koma Ísey vel á kortið áður en Ólympíuleikarnir hefjast í Tókýó árið 2020.

Verið er að ljúka byggingu nýrrar verksmiðju í nágrenni Tókýó sem hefur framleiðslu á Ísey skyri fyrir Japansmarkað á næstu mánuðum. Heimsókn forstjóra Nippon Ham hefur mikla þýðingu fyrir markaðssetningu á Ísey skyri í Japan, þar sem sterk staða Nippon Ham getur mögulega komið vörunni í allt að 50.000 verslanir í Japan á næstu árum. Innkaupastjórar, fjölmiðlar og neytendur í Japan hafa sýnt skyrinu mikinn áhuga og má segja að umtalsverð eftirvænting sé eftir Ísey skyri í Japan.

Guðlaugur Þór Þórðarsson, utanríkisráðherra Íslands, tók í vikunni á móti forstjóranum ásamt Kitagawa Yasuhiku, sendiherra Japans á Íslandi. Guðlaugur var viðstaddur undirritun upphaflega samningsins í Japan 29. maí s.l. og hefur lagt mikla áherslu á viðskiptasamstarf ríkjanna. Einnig átti Þórdís Kolbrún Gylfadóttir Reykfjörð ferðamála-, iðnaðar- og nýsköpunarráðherra Íslands fund með forstjóra Nippon Ham s.l. mánudag. Þórdís var í Japan í september 2018 og hefur einnig lagt mikla áherslu á viðskiptasamstarf ríkjanna m.a. á sviði jarðhita, nýsköpunar og ferðamála.

Forstjóri Nippon Ham heimsótti í ferðinni afurðastöð MS á Selfossi og höfuðstöðvar MS í Reykjavík þar sem viljayfirlýsing um frekara samstarf í Asíu var undirritað af Ara Edwald forstjóra MS og Yoshihiko Ishii forstjóra Nippon Luna.

Yoshihiko Ishii forstjóri Nippon Luna og Ari Edwald forstjóri Mjólkursamsölunnar við undirritun viljayfirlýsingar ásamt starfsfólki Nippon Luna, Nippon Ham, Ísey Export og Takanawa.

Yoshihide Hata forstjóri Nippon Ham og Þórdís Kolbrún Gylfadóttir Reykfjörð ferðamála-iðnaðar og nýsköpunarráðherra.

Kitagawa Yasuhiku sendiherra Japans á Íslandi, Yoshihide Hata forstjóri Nippon Ham og Guðlaugur Þór Þórðarsson utanríkisráðherra Íslands.

 

 

 

 

Fleiri fréttir