MS undirritar samstarfssamning við sprotafyrirtækið Lava Cheese

13.02.2017

Lava Cheese, sprotafyrirtæki í eigu Guðmundar Páls Líndal og Jóseps Birgis Þórhallssonar, og Mjólkursamsalan hafa gert með sér samkomulag um samvinnu við vöruþróun og framleiðslu á Lava Cheese ostasnakki. Lava Cheese er íslensk matvara sem þeir félagar fengu hugmyndina að og hófu framleiðslu á í kjölfarið en henni var strax vel tekið og er hún fáanleg á völdum sölustöðum á Íslandi.

Lava Cheese framleiðir samnefnt ostasnakk, Lava Cheese, úr Cheddarosti frá MS og hefur það vakið verðskuldaða athygli fyrir bæði frumleika og gott bragð.

Markmið samkomulagsins er að skoða grundvöll fyrir samvinnu fyrirtækjanna um áframhaldandi þróun á Lava Cheese ostasnakki. Jafnframt er ætlunin að skoða mögulegan samstarfsgrundvöll við framleiðslu á vörunni. Jón Axel Pétursson, framkvæmdastjóri sölu- og markaðssviðs MS segist vera mjög spenntur fyrir þessu samstarfi og sér hann mikla möguleika fyrir þessa vöru í framtíðinni. „Það er spennandi fyrir fyrirtæki eins og MS að vinna með ungum og efnilegum frumkvöðlum eins og Guðmundi og Jósepi og eru starfsmenn MS sammála því að þessi nýja vara sé frábær á bragðið og bjóði upp á spennandi möguleika til frekari vöruþróunar,“ segir Jón Axel. MS mun fyrst og fremst vera Guðmundi og Jósepi ráðgefandi aðili við útfærslu á framleiðslu og frekari þróun vörulínu Lava Cheese en eigendur Lava Cheese munu sjálfir sjá um allt sem snýr að sölu og markaðssetningu vörunnar á innanlandsmarkaði. „Ef viðtökur verða góðar á innanlandsmarkaði eins og við væntum og gerum ráð fyrir, ætlum við í framhaldinu að skoða í sameiningu útflutningsmöguleika á vörunni en MS hefur um árabil unnið með íslenska skyrið á fjölda erlendra markaða og hefur þannig byggt upp sterk viðskiptatengsl sem gætu nýst við útflutning á vörunni,“ segir Jón Axel enn fremur.

Stefnt er að því að Lava Cheese muni í framtíðinni hafa starfsaðstöðu í Landbúnaðarklasanum en þar hafa nýir frumkvöðlar í framleiðslu og þróun matvæla úr íslenskum landbúnaði komið sér fyrir. Landbúnaðarklasinn er staðsettur á sama stað og Sjávarklasinn, sem hefur aðstöðu úti á Grandagarði. Á meðfylgjandi mynd undirrita þeir Lava Cheese eigendur, Guðmundur og Jósep, samstarfssamninginn ásamt Jóni Axel, framkvæmdarstjóra sölu- og markaðssviðs MS og Birni S. Gunnarssyni, vöruþróunarstjóra MS.

Eigendur Lava Cheese með afrakstur vinnunnar en viðtökur á Cheddar ostasnakkinu hafa farið fram úr björtustu vonum þeirra félaga.

Fleiri fréttir