MS hafnar fullyrðingum Hálfdáns Óskarssonar, framkvæmdastjóra Örnu, í Fréttablaðinu, 10. ágúst.

12.08.2016

Vegna ummæla Hálfdáns Óskarssonar, framkvæmdastjóra Örnu, í viðtali í Markaðnum í Fréttablaðinu 10. ágúst síðastliðinn, langar mig að árétta eftirfarandi:

Í viðtalinu segir Hálfdán að MS geti „komið með laktósafríar vörur og undirboðið [vörur Örnu] þegar [MS] sýnist. Bara drepið okkur á nokkrum vikum.“

MS hafnar þessum fullyrðingum. MS hefur fagnað nýjum framleiðendum í mjólkuriðnaði. Sú gróska sem á sér stað í greininni er mikið gleðiefni og sem stærsti aðilinn á markaðnum höfum við hjá MS einmitt gætt þess að gefa nýjum framleiðendum svigrúm þegar komið er fram með nýjar vörur og vöruflokka með því að fara ekki sjálf inn á viðkomandi svið.

Undirboð á vörum sem MS verðleggur sjálft væri lögbrot þar sem um markaðsráðandi fyrirtæki er að ræða. Þetta ákvæði samkeppnislaga gildir aftur á móti ekki um smærri framleiðendur.

Hálfdán segir í viðtalinu að MS hafi komið fram með laktósafría léttmjólk „um leið“ og við hefðum „frétt“ að þau væru að „fara af stað” með sína framleiðslu á laktósafríum vörum. Þetta er einfaldlega rangt. MS hafði verið með laktósafría léttmjólk í þróun í tvö ár áður en að Arna hóf starfsemi. Þegar Arna hóf rekstur og ljóst var að þau hefðu í hyggju bjóða fram fleiri tegundir af laktósafríum vörum ákvað MS að fara ekki út í frekari þróun eða framleiðslu á vörum sem Arna framleiðir, einmitt til að nýr og smærri framleiðandi hefði þarna svigrúm til nýsköpunar á markaði.

Það er hagur allra að sjálfstæðum mjólkurframleiðendum farnist sem best. Bæði MS, félagi í eigu íslenskra kúabænda, sem selur þeim hrámjólk og neytenda sem njóta fjölbreyttari mjólkurvara.

Að lokum langar mig að óska Hálfdáni og fyrirtækinu Örnu áframhaldandi góðs gengis og velfarnaðar.

Ari Edwald, forstjóri MS

Fleiri fréttir