Gert ráð fyrir söluaukningu mjólkurafurða

30.09.2013

Undanfarið hefur mikið verið fjallað um söluaukningu mjólkurafurða. Hér fyrir neðan er fréttatilkynning sem send var frá MS, miðvikudaginn 25. september síðastliðinn.

Gert ráð fyrir um 7,7 milljóna lítra söluaukningu mjólkurafurða á tveimur árum
-        Nemur framleiðslu 40 meðalkúabúa
-        Bændur undirbúa framleiðsluaukningu 2014 til að mæta eftirspurn
-        Tillaga um að greiðslumark 2014 verði 123 milljónir lítra sem er 7 milljónum lítra meira en upphaflegt greiðslumark þessa árs og um 5 milljónir lítra umfram sölu ársins
Gert er ráð fyrir að á tveggja ára tímabili frá 2012 – 2014 verði um 7,7 milljóna lítra auking í mjólkursölu innanlands. Þetta er einsdæmi. Söluaukninguna má einkum rekja til fitumeiri afurða. Samtök afurðastöðva í mjólkuriðnaði hafa gert um það tillögu til landbúnaðarráðherra að greiðslumark í mjólk, sem er samanlagður kvóti bænda til framleiðslu fyrir innanlandsmarkað, verði aukið úr 116 milljónum lítra  árið 2013 í 123 milljónir lítra 2014. Innanlandssalan á þessu ári verður fyrirsjáanlega meiri en nemur upphaflega greiðslumarkinu eða kvótanum og þegar hefur verið heimilað að auka hann um 3 m.lítra á þessu ári. Spáð er áframhaldandi aukingu vegna sterkrar eftirspurnar.
Það er fyrst og fremst aukin sala fitumeiri afurða á borð við smjör, ost, nýmjólk og ýmsar aðrar vörutegundir sem knýr þessa söluaukningu. Salan var liðlega 115 milljónir lítra árið 2012, en gert er ráð fyrir að hún verði 123 milljónir lítra árið 2014. Það er 7,7 milljóna lítra aukning á tveimur árum. Bændur hafa verið hvattir til að auka framleiðsluna þegar á síðustu vikum þessa árs og búa sig undir enn aukna sölu á því næsta.
Kúabændur eru afar þakklátir íslenskum neytendum fyrir það traust sem vörur þeirra njóta á markaði. Mikið hefur verið lagt upp úr hagræðingu í mjólkurvinnslunni til að hægt sé að halda verði á mjólkurafurðum í skefjum. Það á þátt í þeirri söluaukningu sem sést á undanförnum misserum auk vöruþróunar og nýrra viðhorfa á markaði.

Fleiri fréttir