60 milljón lítra vinnslustöð

14.10.2013

Mjólkursamsalan opnaði síðastliðinn föstudag, endurnýjaða vinnslustöð á Selfossi þegar Sigurður Ingi Jóhannsson, landbúnaðarráðherra, ræsti stærstu mjólkurpökkunarvél búsins. Mjólkurvinnsla á Selfossi verður stækkuð um 40% þegar liðlega 20 milljóna lítra mjólkurpökkun flyst frá Reykjavík. Mjólkursamsalan hefur þá fjárfest í Selfossbúinu fyrir rúmlega einn og hálfan milljarð króna á fjórum árum. Heildarendurskipulagningu búsins og mjólkurvinnslu í landinu er því um það bil að ljúka.

Einar Sigurðsson, forstjóri Mjólkursamsölunnar sagði að með endurnýjun vinnslustöðvarinnar yrði öll vinnsla og pökkun drykkjarmjólkur fyrir vestan- og sunnanvert landið færð til Selfoss og þar yrði einnig framleiðsla á sýrðum vörum og viðbiti (smjörvörum) fyrir allt landið. „Markmið fyrirtækisins er að tryggja neytendum mikið vöruúrval og vörugæði og hagkvæmt vöruverð. Uppbyggingin á Selfossi styrkir fyrirtækið í sókn að þessum markmiðum. Við erum þegar komin með á markað fyrstu nýjungarnar í drykkjarvörum og neyslumjólk í breyttum umbúðum. Von er á enn fleiri nýjungum í öllum þessum vöruflokkum“.
MS tekur á móti 60 milljón mjólkurlítrum á ári á Selfossi og umbreytir í hollar og góðar mjólkurafurðir fyrir neytendur. Mesta breytingin verður í þessum mánuði þegar öll mjólkurpökkun flyst frá Reykjavík til Selfoss.  Öll viðbitspökkun fyrir landið verður þar í sérstakri viðbitsdeild (smjörvörudeild) og vinnsla og pökkun á nær öllum sýrðum vörum á borð við skyr og jógúrt.
Guðmundur Geir Gunnarsson, mjólkurbússtjóri á Selfossi, sagði að það yrði sannarlega áskorun fyrir starfsfólk á Selfossi að taka á móti til vinnslu öðrum hverjum lítra mjólkur sem framleiddur er í landinu. „Við búum hér að yfir 80 ára reynslu, mikilli fagþekkingu og frábæru og samhentu starfsfólki. Við ætlum okkur stóra hluti, ekki aðeins í því magni sem fer hér í gegn, heldur einnig í áframhaldandi vöruþróun og áherslum á vörugæði. Við ætlum að tryggja markaðnum hér bestu mjólkurafurðir sem völ er á.“
Mjólkursamsalan var stofnuð í núverandi mynd í ársbyrjun 2007. Síðan hefur verið unnið að mikilli hagræðingu í greininni og með því hefur árskostnaður við mjólkurvinnslu í landinu verið lækkaður um ríflega tvo milljarða króna eða um liðlega 20%. Ávinningi af því hefur verið veitt til bænda í formi hærra hráefnisverðs og til neytenda með því að haldið hefur verið aftur af vöruverðshækkunum.   Enduruppbygging mjólkurvinnslunnar á Selfossi er hluti af þessu hagræðingarverkefni. Þar hefur tekist að endurskipuleggja starfsemina í eldri byggingum þannig að vinnslan hefur verið aukin um 40% án þess að bæta við húsnæði.
Yfir 200 gestir fylgdust með opnun endurnýjaðrar stöðvar og voru viðstaddir auk ráðherra, starfsmenn, núverandi og fyrrverandi, þingmenn og sveitarstjórnarmenn og fulltrúar verslunarinnar.

Fleiri fréttir