Skyrherferð The Engine og MS í Bretlandi vann til virta verðlauna

08.05.2017

The Engine, íslenskt fyrirtæki sem sérhæfir sig markaðssetningu á netinu, hlaut nýverið alþjóðlegu
Evrópuleitarverðlaunin (e. European Search Awards) fyrir auglýsingaherferð sem það vann í samstarfi
við MS í tengslum við komu íslenska skyrsins á markað í Bretlandi.
 
Verðlaunin voru veitt í flokknum Besta staðbundna herferðin (e. Best Local Campaign) sem eru ein af
virtari og eftirsóttari verðlaununum keppninnar. Dómarar keppninnar voru á einu máli um að hér
væri á ferðinni öflug herferð þar sem íslensk afurð væri kynnt vel skilgreindum markhópi á ákveðnu
svæði í Bretlandi.
 
„Við hjá The Engine erum afskaplega stolt af samstarfi okkar við MS og þeim árangri sem náðst hefur í
Bretlandi. Verðlaunin eru mikil viðurkenning fyrir okkur og hvatning til að halda áfram í sömu átt”,
segir Guðbjörn Dan Gunnarsson, framkvæmdastjóri The Engine.“ Hann bætir við að samkeppnin hafi
verið gríðarlega hörð og það hafi því komið honum og samstarfsfólki hans skemmtilega á óvart að
hljóta verðlaunin þar sem önnur fyrirtæki sem tilnefnd voru í flokknum eru á meðal þekktustu og
virtustu netmarkaðsfyrirtækja heims.
 
MS vann náið með The Engine að undirbúningi herferðarinnar og var auglýsingaefninu fyrir skyrið
breytt og það aðlagað sérstaklega til að falla sem best að netherferð í Bretlandi. „Þessi verðlaun eru
enn frekari staðfesting á því hvað gott efni og góð skipulagning getur skilað miklu í því að auka vitund
neytenda erlendis á íslenska skyrinu í gegnum netið,“ segir Guðný Steinsdóttir, markaðsstjóri MS.
„Auglýsingabirtingar á netinu eru margfalt ódýrari en í hefðbundnum miðlum eins og sjónvarpi,
dagblöðum og tímaritum, sér í lagi þegar stærri og dýrari markaðir eins og Bretland eiga í hlut,“ segir
Guðný enn fremur. „Við vildum samt sem áður reyna að vekja athygli á komu íslenska skyrsins til
Bretlands og ákváðum að fara þá leið að notast við netauglýsingar, en á ákveðnum netmiðlum er
hægt að beina þeim á tiltekna markhópa og ná þannig beint til þeirra sem ætlunin er að höfða til,“
segir Erna Erlendsdóttir, vef- og vörumerkjastjóri hjá MS.
 
 
Evrópuleitarverðlaunin eru ekki eina viðurkenningin sem samstarf The Engine og MS, við þessa
herferð, hefur skilað því áður hafði Google boðið fyrirtækjunum að mæla árangurinn af herferðinni
og í kjölfar glæsilegra niðurstaðna úr þeirri könnun óskaði Google eftir leyfi til að gera svokallaða
tilviksrannsókn (e. case study), tengda þessari tilteknu herferð með það að markmiði að sýna minni
fyrirtækjum að það getur verið árangursríkt að notast við þá þjónustu sem þeir bjóða upp á í gegnum
Google Adwords.
 
 
Mynd 1: Starfsmenn The Engine veita verðlaununum. Frá vinstri Guðbjörn Dan Gunnarsson, Þór
Matthíasson og Gunnlaugur Arnar Elíasson ásamt kynni hátíðarinnar.
Mynd 2: Guðný Steinsdóttir og Erna Erlendsdóttir.
 
Allar nánari upplýsingar veitir Erna Erlendsdóttir, vef- og vörumerkjastjóri hjá MS í síma 858 2274.

Fleiri fréttir