Gómsætar jólagjafir - ostakörfur og gjafir sem gleðja

20.10.2017

Ostar eru frábærir í tækifæris- og jólagjafir og sívinsælir á veisluborðið. Falleg gjafakarfa með úrvali af bragðgóðum íslenskum ostum og öðru góðgæti er gómsæt gjöf sem gleður í aðdraganda jólanna. MS býður upp á fjölbreytt ostakörfuúrval þar sem allir geta fundið eitthvað við sitt hæfi, en körfurnar koma í ýmsum stærðum og gerðum. „Í öllum körfunum eru mygluostar úr Dölunum í aðalhlutverki, t.d. Camembert og Kastali og þeim fjölgar eftir því sem körfurnar stækka,“ segir Kristín Ýr Bjarnadóttir sem hefur yfirumsjón með ostakörfugerðinni. „Stærri og veglegri körfurnar innihalda enn fremur aðra bragðgóða osta eins og Auði, Gullost og Óðals-Tind, ásamt kjöti og sælgæti og er óhætt að segja að þær hafi verið mjög vinsælar hjá íslenskum fyrirtækjum undanfarin ár.“

Kristín bendir á sérstaka nýjung sem verður boðið upp á í ár en um er að ræða ostakörfugjafabréf sem gerir fyrirtækjum og almenningi kleift að gefa körfur sem viðtakendur geta svo pantað og sótt þegar þeim hentar, hvort sem er fyrir eða eftir jól. „Það er okkar von að gjafabréfunum verði vel tekið,“ segir Kristín, „enda hafa viðskiptavinir okkar þá val um það hvenær þeir vilja gæða sér á ostaveislunni sinni.“ Til viðbótar er hægt að bæta við lítilli hnífaöskju, sem inniheldur tvo fallega ostahnífa, í allar körfur.

Sölumenn MS eru boðnir og búnir við að aðstoða viðskiptavini sína við val á körfum og þá er einnig hægt að setja saman sínar eigin körfur. „Við höfum það að leiðarljósi að í öllum körfunum, óháð stærð þeirra, er hugað sérstaklega vel að því að úrval osta og meðlætis sé fjölbreytt og að ostarnir parist vel saman á ostabakka,“ segir Kristín að lokum og sendir bendir áhugasömum á að sérstakur jólakörfuvefur verður opnaður hér á ms.is þegar nær dregur jólum.


Kristín Ýr Bjarnadóttir með girnilega ostakörfu frá MS. Mynd/Fréttablaðið

 

 

Fleiri fréttir