Skólahreysti 21. febrúar

Sjötti riðill í Skólahreysti fór fram í Íþróttahúsinu Tjarnarbraut á Selfossi  21. febrúar síðastliðinn. Alls öttu þrettán grunnskólar á Austurlandi kappi í þessari æsispennandi keppni og hafa þrír skólar bæst í hópinn frá því í fyrra.  
  
Tvö lið slógust um efstu sætin alla keppnina, sigurvegarinn frá því í fyrra, Grunnskóli Hornafjarðar og Grunnskóli Fáskrúðsfjarðar sem var í öðru sæti í fyrra. Að lokum fór svo að Grunnskóli Fáskrúðsfjarðar sigraði keppnina en Grunnskóli Hornafjarðar varð að láta sér lynda annað sætið. Í þriðja sæti varð svo Hallormsstaðaskóli. Með sigrinum hefur Grunnskóli Fáskrúðsfjarðar tryggt sér þátttökurétt í úrslitum Skólahreystis sem fer fram í Laugardalshöllinni 17. apríl næstkomandi.

 Hraðaþrautina sigraði Vopnafjarðarskóli sem fór brautina á 3:02 mínútum. Í upphífingum sigraði Ólafur Albert Sævarsson og flestar armbeygjur tók Anna Mekkín Reynisdóttir, bæði úr Grunnskóla Hornafjarðar. Flestar dýfur tók Hilmar Bjartþórsson úr Grunnskóla Fáskrúðsfjarðar og Bryndís Hjálmarsdóttir úr sama skóla sigraði hreystigreipið.   

Keppnin var gríðarlega spennandi og voru áhorfendabekkir troðfullir. Að sögn forvarsmanns íþróttahússins hefur aldrei jafnmikið af áhorfendum komið í húsið.  Keppni milli skólanna var hörð og ljóst er að mikil stemning er fyrir keppninni meðal nemenda skólanna.
 
Sýnt verður frá Skólahreysti á Skjá einum 26. febrúar kl. 20:00. Næsta keppni í Skólahreysti verður haldin í Íþróttahöllinni Skólastíg á Akureyri 28. febrúar næstkomandi.