Skráargatið („nyckelhålet“ á sænsku) hefur verið í notkun í Svíþjóð í yfir 20 ár og er orðið vel þekkt þar í landi. Árið 2007 ákváðu Svíar, Norðmenn og Danir að vinna að því að koma á fót samnorrænu merki sem byggt væri á sænska skráargatinu en skilgreiningarnar á bakvið skráargatið voru þróaðar áfram. Slíkt er í samræmi við þróunina almennt á sviði næringar í norrænu löndunum, t.d. eru öll Norðurlöndin með samnorrænar næringarráðleggingar („nordic nutrition recommendations“).

Holla valið verður auðvelda valið

Markmiðið með hollustumerki eins og skráargatinu er að við innkaup geti neytendur á skjótan hátt valið hollar matvörur. Kröfur til matvæla, sem fá merkið, byggjast á viðurkenndum atriðum er snerta samhengi næringar og heilsu. Neytendur geta þá treyst því að vara sem ber hollustumerkið sé hollari en aðrar vörur í sama flokki sem ekki bera merkið. Auk þess að vera upplýsandi fyrir neytendur hvetur slíkt merki matvælafyrirtæki til að þróa hollari vörur. Til þess að hollustumerki skili árangri þarf samstöðu hagsmunaaðila, þ.e. neytenda, verslunar, iðnaðar, stjórnvalda o.fl.

Hollustumerki á Íslandi

Áhugi og umræða um upptöku hollustumerkis hér á landi hefur staðið í nokkur ár. Kannanir hafa sýnt að landsmenn eru jákvæðir í garð hollustumerkja, enda skiptir það neytendur verulegu máli, þar sem það auðveldar þeim holla valið, og hvetur iðnaðinn til þróunar á hollari vörum. Slíkt merki gerir innlendum framleiðendum hollra matvara kleift að merkja þær með þessu merki, en merkingin er valfrjáls svo framarlega sem varan uppfyllir ákveðnar skilgreiningar. Nú þegar eru fluttar inn vörur til landsins sem bera þetta merki og því ætti það að vera réttlætismál innlendra framleiðenda hollra vara að eiga möguleika á að setja slíkt merki á sínar vörur. Lýðheilsustöð styður því að skráargats hollustumerkið verði tekið upp á Íslandi.

Skyr.is drykkirnir frá MS ber hið norræna skráargat