Minjasafn Mjólkursamsölunnar er staðsett að Bitruhálsi 1.
Minjasafnið hefur sögulegt gildi og þar er að sjá myndir og gamla muni sem lýsa sögu Mjólkursamsölunnar og mjólkuriðnaðarins á Íslandi.
Mjólkurbúðirnar skipa stóran sess í sögu MS, en þær voru á annað hundrað í Reykjavík. Aukin tæknivæðing og gjörbreytt aðstaða hjá almennum matvöruverslunum varð til þess að haustið 1976 var þeim öllum lokað. Í minjasafninu er að finna myndir úr mjólkurbúðunum og muni er tengdust þeim, t.d. vogir sem notaðar voru til þess að vigta skyr, sem selt var eftir vigt og pakkað í smjörpappír.

Umbúðir utan um mjólk hafa breyst mikið á síðastliðnum 60 árum. Mjólkin var fyrst seld í lausu máli og flutt í verslanir í stórum brúsum, sem síðan var ausið úr í þau ílát sem viðskiptavinirnir komu með. Mjólkurbrúsar af ýmsum stærðum (ásamt ausunum) eru til sýnis í safninu. Seinna var mjólkin seld í glerflöskum, en vegna hörguls á þeim í seinni heimsstyrjöldinni var aftur horfið til mjólkurbrúsanna.

Árið 1959 var byrjað að pakka mjólk í hyrnur, áhugaverða nýjung í mjólkurumbúðum frá Tetra Pak í Svíþjóð. Um 1970 komu ferhyrndu umbúðirnar í þeirra stað, en þær hafa verið notaðar síðan.

Í safninu er að finna sýnishorn af mjólkurvinnslumunum frá ýmsum tímabilum, t.d. skilvindur og strokkar, sem sýna þróun þeirra og tæknivæðingu. Þá er þar mjólkurbrúsi sem var í eigu fransks baróns sem fluttist hingað til lands árið 1898 og bjó á Hvítárvöllum í Borgarfirði. Árið 1899 lét hann reisa fjós fyrir 50 kýr ásamt hlöðu þar sem nú mætast Barónsstígur (sem er kenndur við nefndan barón) og Hverfisgata, en þetta var fyrsta steinsteypta húsið í Reykjavík. Verslunin 10/11 er nú í þessu húsnæði.